Khawvel huap inelnaah Mizo in Quarter Final thleng

15^th September, 2017

Dt. 11-17,September 2017 chhungin Rajiv Gandhi Indoor Stadium, Cochin, Karela ah Badminton World Federation (BWF) World Senior Championship, 2017 neih a ni a, hetah hian Mizoram Badminton Association player mi 5 – Ralliantawna, F. Zikima, Lalthanzuala, Vanhmingthangi leh Zodinsangi te telin 50+ MS khel Pu Lalthanzuala chuan Quarter Final a thleng a ni.

He Tournament-ah hi khawvel huap inelna a nih angin ram hrang hrang atangin players 663 an tel a. category hrang hrang 40-ah inelna neih niin 35+ atanga 70+ Age category-te a awm a ni. India ram aiawh hian players 174 telin heng zinga mi 5 te chu MBA players an ni bawk.

MBA Veteran Player Ralliantawna chuan 70+ MS khelin 1st Round-ah Bye in 2nd Round-ah Malaysia player Lai Loon Foo nen intumin an inhneh tawk hle a. Game hmasaah Lai-in 21-12 a game lain, second game erawh Pu Rala’n awlsam takin 21-5 in a la ve thung a, Final game khelh chhunzawm nghal niin an inhnehtawk hle a, point in hnaih taka kal chho zelin a tawpah 21-19 in Lai in chakna a chang ta a ni. Pu Ralliantawna hian 70+ Mixed Doubles khel bawkin, India mi tho Olga Dcosta nen tang dunin England partner Jim Garrett leh Susan Awcock te tumin 21-10 leh 21-9 in an chak zo lo bawk a ni.

65+ MS ah Pu F. Zokima khel ve lehin Japan player leh tun tournament-a Seeded No. 5 Hirohisa Toshijima nen intumin, game hmasaah in thlau viau lo mahse, game hnungah erawh Seeded player Hirohisa zawkin game thununin 21-15 leh 21-7 in chakna a chang zawk a ni.

MBA hmeichhe Veteran player Vanhmingthangi leh Zodinsangi te inkawp chuan 45+ WD khelin an ni hi Group D-ah an awm a, an group ah hian France partner Sylviane Le Pimpec leh Marie-Noelle Lechalupe te inkawp bakah German player Jana Dudek leh Poland player Dorota Grzejdak te inkawp an awm bawk a ni. Group level hi League system-a khelh niin India partner hian France partner-te tum hmasain 21-11 leh 21-10 in an hneh loh hnuah Germany leh Poland tangdun tum lehin 21-9 leh 21-8 in an hneh loh leh a, Group level an pel zo ta lo a ni.

India aiawha MBA player khel Lalthanzuala chuan 50+ MS khel ve bawkin First Round ah Bye in Second Round-ah tun championship-a Seeded No 2, Austria mi Peter Moritz tumin game zawng zawngah Pu Zuala hi chungnung zawk zelin hma hruaitu a ni zel a, 21-14 leh 21-14 a chakin Second Round a paltlang a ni. Third Round ah Benno Raj, Germany chu tum lehin, game hmahruaiah chungnung zawk sawitur awmlo mahse German player vannei zawkin 21-19 in game a la a. Game khelh chhunzawm leh a ni a, Pu Zuala rawn insiam thain game a thunun hneh hle a, harsa lo takin game laihawl chu 21-7 in a rawn la ve leh. Final game khelh leh niin Pu Zuala a chungnung zawk zel a, hmahruaitu ni zelin a tawp thlenga point hma hruaiin 21-12 a chakin Quarter Final a in vaw thleng ta a ni. Quarter Final-ah hian Championship-a Seeded No. 5 Karoon Kasayapanan, Thailand mi nen an in tum leh a, game hmasaah Pu Zuala game a fuh hlei thei lo a, Karoon in game a thunun zawk a,21-9 in game hmahruai lain, game khelh chhunzawm a ni a, Pu Zuala rawn insiamtha in game ah chungnung zawk an awm lo mahse, Pu Zuala hi 21-19 a vanduaiin Semi-Final a thleng zo ta lo a ni.

Khawvel huap inelnaa Mizoram Badminton Association Player telte MBA chuan a chhuang tak meuh meuh a, chakber nihna thleng zo lo mahse, an thlen chin ropui tiin a kal zelna turah duhsakna sangber a hlan a ni.

He Championship ah hian MBA mi leh sa HS Dinpuii (National Umpire) leh Lalhruaitluangi (State Umpire) te chu Official turin an tel bawk a ni.